ГРЕШКА НА КОМПАНИЈАТА ИЛИ НА КЛИЕНТОТ?! Airbnb казнета поради забуна со долари
Австралијанци кои резервираа сместување преку најпознатата платформа во светот Airbnb, за што им било наплатено во американски долари, може да сметаат на компензација. Имено, Федералниот суд ја казни оваа компанија со 15 милиони австралиски долари, бидејќи не појаснила дека цените на резервацијата не се изразени во таа валута, туку во американската валута.
Покрај тоа, на Airbnb му беше наложено да плати до 15 милиони долари како компензација на илјадници други засегнати корисници – во форма на рефундирање и такси за конверзија – при што корисниците се очекува да добијат во просек 230 долари.
Помеѓу јануари 2018 и август 2021 година, беше откриено дека Airbnb дала лажни или погрешни тврдења до приближно 70.000 клиенти, чии цени се во американски долари.
„Тоа е софтверска грешка“
Имено, веб-страницата ги прикажувала цените користејќи го симболот „$“, но не е јасно дека цените се изразени во американски, а не во австралиски долари. Уште на почетокот на овој случај, Airbnb призна дека го прекршила австралискиот Закон за заштита на потрошувачите со оваа практика, а случајот беше инициран минатата година од Комисијата за конкуренција и потрошувачи (ACCC).
Судијата во пресудата навел дека Airbnb не прецизирал дека цените се во американски долари, освен на дното на првите три веб-страници за резервации, а потоа поизразено на четвртата страница, кога корисникот ја потврдил резервацијата.
Исто така, судот забележа дека 2.088 клиенти се пожалиле на Airbnb дека им се наплатува во американски долари, но им било кажано дека „избрале своја валута“, што, како што се вели, е неточно.
Airbnb has been fined $15 million after it showed Australian users accommodation prices in US dollars. https://t.co/wTMA3rqroz
— SBS News (@SBSNews) December 20, 2023
Компанијата за резервации за сместување подоцна ја обвини софтверската грешка за проблемот, при што програмата наводно не им ја понудила на клиентите во Австралија локалната валута, пишува Гардијан.
Сепак, Airbnb ќе треба да ги плати и судските трошоци на надлежната комисија, а се додава дека веќе ги надоместила трошоците на 8.000 корисници: сумата е околу 9,4 милиони долари. Сепак, судот утврди дека вкупната вредност на разликата меѓу австралиските и американските цени за предметните резервации изнесувала дури 16,8 милиони долари.
Судијата посочил дека Airbnb веројатно има корист од „корисниците што претпоставуваат“ дека цените се изразени во австралиски долари, бидејќи тоа го прави сместувањето подостапно.
Фото: Принтскрин/Твитер
