Грците и должат на државата 108 милијарди евра, започнува операција за поефикасна наплата
Грција започнува со акцијата „Чист регистар“ за поефикасно справување со наплатата на долговите од страна на граѓаните и фирмите кон државата, објави АНА-МПА.
Независниот орган за јавни приходи (AADE) продолжува со систематско евидентирање и управување со заостанатите долгови кон државата, со цел подобрување на ефикасноста во наплатата на јавните приходи и одразување на реалната економска слика на земјата.
Според најновите достапни податоци, вкупниот износ на заостанатите долгови изнесува приближно 108,4 милијарди евра, што значително го оптоварува државниот буџет и финансиското управување.
Вклучувањето во регистарот, врз основа на Законот за наплата на јавни приходи (KEDE), бара целосно исцрпување на сите можности за лоцирање на средствата на должникот и сите други поврзани одговорни лица, објави АНА-МПА.
Проблем претставува тоа што многу должници пријавиле мал имот, поради што ќе се бараат средства и кај трети поврзани страни, а се очекува и да се зголеми поднесувањето на кривични пријави.
