Таткото на загинатиот член на ДНК со порака до Мицкоски и Сиљановска: Имаме претседателка, имаме премиер, ветија дека ќе бидат за сите граѓани – тоа што ветија, не го исполнија!
Емоции, гнев и разочараност ги обоија денешните моменти на Маршот на ангелите во Кочани, каде што родителите на жртвите од трагедијата во дискотеката Пулс повторно побараа одговорност и вистинска поддршка од државниот врв.
Таткото на Георги Георгиев, починатиот член на музичката група ДНК, испрати директна и потресна порака до претседателот на Владата Христијан Мицкоски и претседателката на државата Гордана Сиљановска-Давкова, изразувајќи длабоко разочарување за, како што рече, нивната неисполнета поддршка и заборав кон семејствата на настраданите.
„Имаме претседателка, имаме премиер, ветија дека ќе бидат за сите граѓани – мајка, татко – тоа што ветија, не го исполнија. Маќео, ми пушти писмо, па ме заборави за 24 часа. Маќео, на што личи ова? Без потпис. Лично тебе ти се обраќам, Мицкоски. Се нарекуваш патриот, маж, не ве срам! Имате ли деца? Да се живи и здрави, ама за 63 жртви, 63 дена душа ќе ви излегува!“, рече со солзи во очите родителот на Георги.
Тој остро ги осуди институциите и функционерите кои, според него, останале глуви на болката и потребите на семејствата.
„Ти си бил војска? Каде беше кога имаше војна? Јас бев на граница!“, продолжи со огорчен тон, повикувајќи го премиерот да го посети Василево и да се соочи лице в лице со болката на народот.
На крајот од својот говор, родителот остави 1.000 денари, симболично наменети за функционерите – „да купат свеќи и да ги запалат на гробовите на жртвите“.
Маршот, кој се одржува по иницијатива на блиските на трагично загинатите, беше проследен со тага, но и решеност – пораката е јасна: болката не смее да остане игнорирана, а одговорноста е задолжителна.
