Граничниот премин Рафах денеска повторно е отворен за евакуација на странци од Газа
Граничниот премин Рафах денеска е повторно отворен за евакуација на странски државјани од Појасот Газа во Египет, јави Ројтерс, повикувајќи се на палестинските власти во енклавата контролирана од радикалното исламистичко движење Хамас. Излезот беше затворен во петокот.
Ројтерс забележува дека тоа е единствениот влез во енклавата што не е под израелска контрола и затоа е од витално значење и за луѓето кои сакаат да го напуштат појасот и за камионите со помош што влегуваат во него.
Според палестински и египетски извори, кои Ројтерс не ги именуваше, граничниот премин Рафах бил затворен во петокот поради проблеми со Палестинците од северниот дел на Појасот Газа на кои им била потребна итна медицинска помош. Луѓето со сличен проблем денеска ќе можат да преминат на египетска територија заедно со имателите на странски пасоши и нивните штитеници.
Граничниот премин Рафах се отвора денеска во 9:00 часот по локално време, односно 8 по македонско време.
