Граѓаните реагираат дека чекаат за операции во болницата во Штип – од таму велат нема доволно кадар, има листа на чекање

Граѓани од Радовиш и околината на Штип реагираат дека чекаат за операција на жолчка, од штипската болница добиле какошто велат образложение дека нема доволно медицински кадар. Директорот на Клиничка болница – Штип, Ален Ѓеорѓијев потврдува дека има листа на чекање за елективни операции. Најголем проблем во случајов, посочува тој, е ограничениот број на лекари, односно недостатокот на анестезиолози, со кој се соочуваат на Одделението за анестезиологија.

-Тоа не е хронична болест и поради тоа има простор за одложување на операцијата. Се чека по изготвена листа, кога пациентот ќе дојде на ред, истиот ќе се оперира. Нема анестезиолози и тоа е проблемот за кој веќе алармиравме и со кој се соочуваме изминативе месеци, вели Ѓеорѓијев.