Голема полициска акција во Скопје, се конфискуваат десетици тони дрога
Голема полициска операција е во тек во просториите на фирмата „Алфа Фарм“, лоцирана во поранешната фабрика Охис. Акцијата доаѓа како директен одговор на истрагата за петте тони марихуана кои неодамна беа запленети во Србија, за кои тамошните власти потврдија дека потекнуваат токму од Македонија.
Полициските сили влегоа во кругот на фабриката пред околу еден час. На терен се забележани неколку камиони и комбиња, што укажува на тоа дека полицијата се подготвува да изнесе огромно количество марихуана.
Според првичните проценки, количината пронајдена во магацините би можела да ја надмине онаа што беше запленета во Србија.
Фирмата „Алфа Фарм“ е релативно нова на пазарот, формирана во 2023 година, додека лиценцата за одгледување марихуана за медицински цели ја добила во март 2024 година.
Еден од сопствениците на фирмата веќе е уапсен од српските власти по откривањето на пратката. Другиот сопственик моментално е во бегство и по него се трага.
Оваа акција доаѓа по денешната изјава на премиерот Христијан Мицкоски, кој најави дека истрагата ќе разоткрие катастрофални размери на нелегално работење.
Премиерот истакна дека се очекува во магацините низ државата да бидат пронајдени десетици тони марихуана која незаконски се складирала и се пуштала во промет, надвор од строгите протоколи за медицинска употреба.
