ГОЛЕМ ПАД ВО ИНДУСТРИЈАТА – прометот во јануари паднал над 12 проценти, еве во кои гранки најмногу „се осети“
Голем пад е забележан кај прометот во индустријата во текот на месец јануари 2024 година, споредено со истиот месец минатата година. Согласно податоците на Државниот завод за статистика, индексот на прометот во индустријата во јануари 2024 година изнесува 87,2, што всушност покажува дека индустиријата има пад од високи 12,8 проценти.
– Според главните индустриски групи, вкупниот промет во индустријата во јануари 2024 година, во однос на јануари 2023 година, бележи опаѓање кај Интермедијарни производи, освен енергија за 7 проценти и Капитални производи за 25,1 отсто. Додека пораст бележи кај Tрајни производи за широка потрошувачка за 1,9 проценти и Нетрајни производи за широка потрошувачка за 8 отсто – се појаснува во соопштението на ДЗС.
Намален е прометот во индустријата, и на месечно ниво, и тоа за 14,5 проценти во јануари, во споредба со декември минатата година.
– Според главните индустриски групи, прометот во индустријата на домашниот пазар во јануари 2024 година, во однос на јануари 2023 година, бележи пораст кај Капитални производи за 34,3 проценти и Нетрајни производи за широка потрошувачка за 4,5 отсто, додека опаѓање бележи кај Интермедијарни производи, освен енергија за 2,5 проценти и Tрајни производи за широка потрошувачка за 3,5 отсто – се појаснува во соопштението.
Прометот во индустријата на домашниот пазар, во јануари 2024 година, во однос на декември 2023 има пад од 28,8 проценти.
Додека пак, прометот во индустријата на странските пазари, во јануари 2024 година, во однос на декември 2023 година е намален за 9 проценти.
