Гаши во Вашингтон: Посветеноста на Македонија кон НАТО и САД останува цврста
Во рамки на работната посета на Соединетите Американски Држави, претседателот на Собранието Африм Гаши денеска се обрати на Форумот за безбедност во Вашингтон, каде што говореше на тема „Инвестирање од 5% во одбраната и посветеноста кон партнерството со САД“. На форумот учествуваа светски лидери и членови на Американскиот конгрес, а дискусиите беа насочени кон глобалната безбедност и јакнењето на трансатлантската соработка.
Во своето обраќање, Гаши истакна дека посветеноста на Република Северна Македонија кон НАТО е силна и доследна, нагласувајќи дека ниту една држава не може самостојно да ја гарантира својата безбедност. Тој потенцираше дека земјата активно придонесува во Алијансата, ги исполнува преземените обврски и го докажува партнерството преку конкретни дела.
„Во време на глобална неизвесност, соработката во рамките на НАТО е поважна од кога било, особено за земји како нашата, во срцето на Балканот. Зајакнувањето на институциите, инвестициите во одбраната и заедничката интероперабилност се од суштинско значење за нашата колективна отпорност“, истакна Гаши.
Тој нагласи дека Северна Македонија стои како лојален сојузник на НАТО и стабилен партнер на Соединетите Американски Држави, потсетувајќи на пораките за единство и заеднички вредности на поранешните американски претседатели Џон Ф. Кенеди и Џорџ В. Буш.
„Северна Македонија ја избира одговорноста наместо двоумењето и единството наместо поделбите. Ова е нашето ветување кон заедничките вредности, заедничката безбедност и силната трансатлантска алијанса“, порача претседателот на Собранието.
Гаши го заврши обраќањето со порака на благодарност и со потврда за континуираната посветеност на земјата кон НАТО и партнерството со САД.
