НЕМА ВЕЌЕ ЗАКАЖУВАЊЕ ОПЕРАЦИИ ПРЕКУ ВРСКИ Отворен портал за неитни хируршки интервенции
Министерот за здравство Азир Алиу денеска на прес конференција го промовираше новиот портал за електронска евиденција за елективни (неитни) хируршки интервенции во јавните здравствени установи.
Неитните, односно елективни хируршки зафати се операции што не мора да се извршат веднаш бидејќи не претставуваат директна закана по животот или здравјето на пациентот. Станува збор за интервенции што се планираат однапред, во договор меѓу лекарот и пациентот, и за кои има доволно време за подготовка, дополнителни испитувања и избор на термин. Во оваа група спаѓаат операции како вадење крајници, хируршко решавање на кила без компликации, интервенции на жолчка без акутно воспаление, како и ортопедски и естетски зафати, кои често се предмет на листи на чекање во јавното здравство.
– Првпат воспоставуваме ред и јасен протокол на транспарентен начин да се води електронска евиденција на закажаните интервенции. Целта е секој пациент да ја добие услугата по принцип „прв дојден, прв услужен”. Порталот овозможува пребарување и приказ на податоци преку повеќе комбинирани параметри за да биде корисен и за граѓаните и за креаторите на политики. Корисниците на јавниот портал можат да пребаруваат по: специјалност на лекар, хируршка интервенција, јавна здравствена установа, лекар специјалист, број на пациенти кои чекаат – посочува министерот Алиу.
Тој наведе и дека во моментот евиденцијата за елективни хируршки интервенции се води во системот Мој термин преку издавање упат со тип „болнички упат за операција”, но утврдени се недоследности, меѓу кои дека упатите не се издаваат веднаш при утврдување на потребата за операција, туку пред самата интервенција, дел од установите и лекарите користат друг тип упат (конзервативен третман) за евиденција на пациенти на листата, а лекарите листите ги водат во хартиена форма, додека листите на чекање не се редовно прочистувани и тоа создава неточна перцепција за времето на чекање и реалните потреби.
– До јавните здравствени установи кои вршат хируршки интервенции веќе се испратени поединечни известувања со податоци од спроведената анализа. На установите поединечно им е посочено дали и колку се разликува бројот на извршени интервенции, со бројот на реализирани упати за операција во системот Мој термин. Со оваа новина ја унапредуваме транспарентноста, овозможуваме реално мерење на времето на чекање, а со тоа и подобро планирање и распределба на ресурси, како и примена на европските практики во оваа област, заклучи министерот.
Порталот може да се отвори на следниот ЛИНК.
.
