ГАК: Нема физички повреди, причината за смртта на новороденчето е незрелост на белите дробови!
Скопската Клиника за гинекологија денеска преку соопштение информира дека обдукцијата на новороденчето покажала оти нема физички повреди на органите, а причината за смртта е респираторна инсуфициенција предизвикана од респираторен стрес синдром и незрелост на белите дробови.
Клиниката наведува дека семејството е информирано за резултатите од обдукцијата и им е објаснет наодот. Министерството за здравство веќе формира стручна комисија со цел целосно расчистување на случајот и утврдување на евентуални неправилности во грижата за новороденото. Согласно заклучоците на комисијата, Клиниката ќе постапи по сите законски пропишани процедури, вклучително и евентуална дисциплинска постапка во дозволениот рок.
Во соопштението, ГАК изразува длабока жалост и сочувство до семејството, нагласувајќи дека вработените секојдневно се посветени на здравјето на новороденчињата и дека загубата се доживува како професионална и емотивна трагедија.
Министерот за здравство, Азир Алиу, на прес-конференција потврди дека комисијата е формирана и апелираше јавноста да почека на конечните извештаи пред да се носат какви било заклучоци.
