Франција испраќа носач на хеликоптери да им помогне на болниците во Газа
Францускиот јуришен брод „Тонер“ се упати кон источниот Медитеран за да им помогне на болниците во Газа, кои се обидуваат да се справат со голем број жртви од израелските воздушни напади, додека горивото и медицинските резерви се при крај, објави Ројтерс.
Претседателот Емануел Макрон рече дека го испраќа носачот на хеликоптери да им помогне на жителите на Газа да добијат пристап до лекови и медицинска нега.
Израел го бомбардира Појасот Газа откако Хамас ги нападна израелските населби на 7 октомври, при што загинаа околу 1.400 луѓе. Министерството за здравство на Газа соопшти дека повеќе од 7.000 Палестинци се убиени во воздушните напади, а илјадници се повредени.
Француското Министерство за одбрана денеска соопшти дека 199-метарскиот воен брод бил испратен да пружи хуманитарна помош, но не е јасно дали тој требало да достави медицинска опрема и материјали во Газа или да обезбеди медицинска помош на ранетите Палестинци на бродот.
„Условите [за обезбедување хуманитарна поддршка] сè уште не се воспоставени. Идејата е прво да се стигне до областа, а потоа да се обезбеди што е можно поголема помош“, рече портпаролот на одбранбените сили.
Покрај тоа што може да носи воени хеликоптери, тенкови и амфибиски возила, Тонер може да служи и како пловечка болница со десетици кревети, рендген апарат и два хируршки одделенија, се наведува на веб-страницата на француското Министерство за одбрана.
