ФОТО Трагедија: Ловец паднал во бездна длабока 150 метри кај Кавадарци, пожарникари со алпинистичка опрема го извлекоа телото!
Тешка несреќа при лов заврши фатално за жител на Кавадарци, кој го загубил животот откако паднал во бездна длабока 150 метри.
По неколкучасовна екстремно тешка акција, припадниците на Територијалната противпожарна единица (ТППЕ) Кавадарци успеаја да го извлечат телото на починатиот.
По добиената пријава за несреќата, на терен излегле петмина пожарникари обучени за работа на височини, придружувани од четворица полициски службеници и членови на семејството на настраданиот.
Според информациите од ТППЕ Кавадарци, теренот бил речиси непрооден, што наложило користење на професионална алпинистичка опрема. Спасувачите морале меѓусебно да се врзуваат и осигуруваат за да се движат по тесните и лизгави карпи на стрмната локација.
„По целодневен напор на сите присутни, телото е успешно извлечено од длабоката бездна и предадено на органите на безбедноста. Интервениравме во екстремно тешки услови за да се спречат дополнителни незгоди,“ изјавија од единицата.
Од противпожарната служба упатија длабоко сочувство до семејството на загинатиот сограѓанин, нагласувајќи ја својата подготвеност да одговорат на секој повик за помош, без разлика на условите.
Надлежните органи извршија увид на местото на настанот за да се утврдат точните причини кои довеле до падот на ловецот.
