Гаши: Собранието не е „гласачка машинерија“, во јануари ќе донесеме нов календар за работа
Претседателот на Собранието, Африм Гаши во интервју за МИА најави суштински промени во начинот на работа на законодавниот дом, со цел да се стави крај на практиката на носење закони по скратена постапка и да се врати дигнитетот на институцијата.
Гаши истакна дека по цела деценија, анкетите за јавното мислење за првпат покажуваат подобрена перцепција на граѓаните за работата на Собранието. Сепак, тој нагласи дека остануваат многу предизвици, пред сè во делот на меѓуинституционалната комуникација.
Како клучно решение за ефикасно планирање, Гаши најави носење на собраниски календар веќе во јануари. Овој календар треба да им овозможи на Владата и министерствата прецизно да знаат кога се планирани пленарните седници.
„Владата и предлагачите ќе знаат точно кога да ги пратат законите ако сакаат да бидат донесени навреме. Мора да се смени пристапот дека Собранието е гласачка машинерија. Законите треба да одат во редовна постапка за да има простор за јавна дебата и вклученост на експертите“, потенцираше Гаши за МИА.
Според претседателот на Парламентот, проблемот со „брзите закони“ не е само кај Владата, туку и во лошата професионална култура на службите низ министерствата која се таложи со децении.
Гаши останува на ставот дека Собранието мора да биде центар на дебатата, а не само место каде формално се потврдуваат владините одлуки.
