ФОТО Конфискуван нелегално изградениот објект на аеродромот Стенковец
Министерството за транспорт најави дека ќе започне постапка за конфискација на нелегално изграден објект на спортскиот аеродром Стенковец во Скопје.
Како што информира министерот Александар Николоски, министерството, како надлежна институција за објекти од прва категорија – меѓу кои аеродроми, болници со терциерна здравствена заштита, објекти за високо образование, спортски сали и стадиони – во изминатиот период сериозно пристапило кон решавање на проблемот со нелегални градби од овој тип.
Во координација со Агенцијата за цивилно воздухопловство, Државниот градежен инспекторат и Аероклубот на спортскиот аеродром Стенковец, ќе се започне постапка за конфискација на објектот. Објектот е целосно нелегално изграден на државно земјиште, па надлежните органи ќе се обратат до Обвинителството и Судот за да биде конфискуван во корист на државата. Целта е објектот да се користи за потребите на Агенцијата за цивилно воздухопловство, вклучително и за тренинг на пилоти.
„Ова е јасна порака дека нема да се толерира изградба на нелегални објекти на места каде министерството за транспорт и Државниот градежен инспекторат имаат надлежност“, изјави Николоски.
