ФОТО „Хибриден напад“ во Скопје, граѓаните се гушат во ѓубре, надлежните ги нема!
Скопје, главниот град на Македонија, се соочува со сериозен проблем со отпадот. Контејнерите низ градот се преполни, а ѓубрето е расфрлано по улиците и тротоарите, создавајќи неуредна слика и сериозна закана за јавното здравје.
На фотографиите, направени на неколку локации во градот, се гледаат преплавени контејнери од кои се излеваат кеси и отпад, формирајќи купишта на тротоарите.
Картони, пластични шишиња и најразличен комунален отпад го попречуваат движењето на пешаците и придонесуваат за непријатна миризба, особено во текот на топлите денови.
Оваа состојба, која се повторува со месеци, предизвикува големо незадоволство кај граѓаните.
На социјалните мрежи денеска реагираа и неколку кандидати за градоначалници. Меѓу нив и независните Горан Марковски и Билјана Ивановска, кои побараа поефикасни решенија за чистотата во градот.
Марковски, преку објава со фотографии од преплавени контејнери, порача:
„Добро утро Скопје! Ако секое утро се туширате и спаструвате за да излезете од дома, такa е и со градот… секое утро треба да е спастрен и дотеран за граѓаните. Нема философија во чистиот град, само добра организација, математички прецизна и инженерски точна.“
Со слична порака се обрати и Ивановска, нагласувајќи:
„Ѓубрето е последно нешто од кое секојдневно сакаме да се ослободиме… но е прво за кое треба издржано решение.“
