Поради нефункционалниот радар, зголемено растојание меѓу авионите над Скопје
Македонската контрола на летање (М-НАВ) издаде официјално известување (NOTAM) со кое се воведува зголемено хоризонтално растојание меѓу авионите во воздушниот простор над Скопје, мерка што може да предизвика доцнења на летовите на Меѓународниот аеродром Скопје.
Според известувањето, од денеска наутро (22.09) до утре напладне (23.09), минималната хоризонтална радарска сепарација во терминалната област на Скопје е зголемена на 10 наутички милји.
Практично, ова значи дека контролорите на летање мора да одржуваат двојно поголемо растојание меѓу авионите кои летаат во близина на аеродромот, што директно го намалува капацитетот на воздушниот простор и бројот на полетувања и слетувања кои можат да се реализираат во еден час.
Во известувањето, кое се однесува на проблематика со Секундарниот надзорен радар (SSR), се наведува дека мерката стапила на сила утринава во 08:37 часот по UTC (10:37 по локално време) и ќе важи до утре, 23 септември, до 12:00 часот по UTC (14:00 часот по локално време).
Патниците кои патуваат во овој период се советуваат да ги следат информациите од своите авиокомпании за можни промени во редот на летање.
