„Фолксваген“ ја престигна „Тесла“ во продажба на електрични автомобили во Германија

Германскиот производител на автомобили „Фолксваген“ ја надмина „Тесла“ и повторно го зазеде првото место по продажба на електрични автомобили во Германија.

Во првите седум месеци од оваа година во Германија се регистрирани 41.475 нови автомобили VW, 1.186 повеќе од американскиот конкурент, покажуваат податоците на германското Федерално биро за моторен сообраќај.

На полугодие, „Тесла“ сè уште беше во водство, како и во текот на минатата година. На трето место по продажба на електрични автомобили се најде „Мерцедес“, со продадени 20.613 возила. Следат „Ауди“ со 16.786, БМВ со 15.987 и „Хјундаи“ со 15.411 продадени возила.

Во првите седум месеци од годинава регистрирани се вкупно 268.926 целосно електрични автомобили. Сепак, ова не е ни приближно до продажбата на модели со мотори со внатрешно согорување, од кои во истиот период се продадени 1,64 милиони.

Фото: EPA-EFE/Filip Singer