Филипче: СДСМ се фокусира на враќање на државата во рацете на граѓаните

Претседателот на СДСМ, Венко Филипче, во интервју за „360 степени“ истакна дека партијата влегува во нова фаза на политичко дејствување, каде главниот фокус повеќе не е изборниот циклус, туку суштинска промена и враќање на државата во рацете на граѓаните.

„Веќе не се спремаме само за избори. Се подготвуваме да ја вратиме власта во рацете на граѓаните, затоа што сме свесни дека државата вака само ќе заглавува. Граѓаните веќе почнуваат да го препознаваат тоа. Морам да кажам дека ние се спремаме за победа на следните парламентарни избори“, порача Филипче.

Тој додаде дека СДСМ е отворен за разговори со сите политички субјекти, но само врз јасно дефинирани стратешки позиции. На прашањето за можноста за соработка со Левица, Филипче посочи дека тоа зависи од усогласеноста на стратешките позиции за напредокот на државата, особено во однос на евроинтеграциите и НАТО.

Филипче заклучи дека борбата на СДСМ е борба за демократијата, слободата и за држава што ќе им служи на граѓаните, а не на партиските и личните интереси.