Европската централна банка намали три клучни каматни стапки
Европската централна банка (ЕЦБ) намали три клучни каматни стапки за 25 базични поени, така што каматната стапка на депозитите сега е 2,5 отсто, каматната стапка на операциите за главно рефинансирање е 2,65 отсто, а каматната стапка на маргиналната кредитна линија е 2,9 отсто.
Овие промени, кои се во согласност со очекувањата на пазарот, ќе стапат на сила на 12 март, а добиените информации покажуваат дека процесот на постепен пад на инфлацијата е „на добар пат“, се вели во соопштението.
Монетарната политика станува значително помалку рестриктивна, намалувајќи ги трошоците за задолжување за претпријатијата и домаќинствата.
Банката прогнозира дека просечната инфлација во еврозоната ќе изнесува 2,3 проценти и ќе падне на 1,9 проценти во 2026 година, пред повторно благо да се зголеми на два проценти во 2027 година.
Прогнозата за 2025 година е ревидирана нагоре во однос на претходната проценка, што одразува посилна динамика на цените на енергијата.
Европската централна банка смета дека основната инфлација во еврозоната ќе биде 2,2 отсто во 2025 година и ќе падне на 2 отсто во 2026 година и 1,9 отсто во 2027 година.
Прогнозите за економски раст на еврозоната се ревидирани надолу на 0,9 отсто во 2025 година и 1,2 отсто во 2026 година, како одраз на слабиот извоз и инвестиции.
Банката очекува раст на економијата на еврозоната за 1,3 отсто во 2027 година, а оваа проценка не е променета во однос на претходниот извештај.
Управниот совет на ЕЦБ не се обврзува однапред на одреден курс на каматни стапки и неговата понатамошна монетарна политика ќе зависи од добиените податоци, се додава на веб-страницата на Европската централна банка.
