„Европа ги прави работите поинаку“: германскиот министер за економија во Пекинг за царините на ЕУ
Предложените царини на Европската унија за кинески стоки не се „казна“, изјави германскиот министер за економија Роберт Хабек на кинеските власти во Пекинг.
Посетата на Хабек на Кина е прва посета на висок европски функционер откако Брисел предложи високи царини за увоз на електрични возила од кинеско производство, пренесува Ројтерс.
Европската комисија прелиминарно заклучи дека производителите на електрични автомобили во Кина профитираат од незаконските државни субвенции и најави дека ќе воведе компензаторни давачки доколку двете страни не најдат решение преку дијалог.
Кина вчера пред пристигнувањето на Хабек предупреди дека ескалацијата на триењето со ЕУ околу електричните возила може да предизвика трговска војна.
„Важно е да се разбере дека тоа не се казнени тарифи“, рече Хабек на првата пленарна седница на Дијалогот за климата и трансформацијата.
Земјите како САД, Бразил и Турција користеа казнени царини, но не и ЕУ, рече министерот за економија и повтори дека компензаторните мерки не се казнени.
„Европа ги прави работите поинаку“, додаде тој.
На состанокот со Џенг Шанџи, претседател на кинеската Национална комисија за развој и реформи, Хабек рече дека предложените тарифи на ЕУ имаат за цел да ги изедначат условите за игра со Кина.
Женг одговори дека ќе направи се за да ги заштити кинеските компании.
Тој, исто така, додаде дека предложените царини ќе им наштетат на двете страни и дека се надева дека Германија ќе покаже лидерство во рамките на ЕУ и „да ја направи вистинската работа“.
Тој, исто така, ги негираше наводите за субвенции, велејќи дека развојот на новата енергетска индустрија во Кина е резултат на сеопфатните предности во технологијата, пазарите и индустриските синџири, поттикнати од жестоката конкуренција.
Фото: Принтскрин/Х
