ЕУ и пет земји го предупредија Трамп на ризик од нови царини за авиони и авионски компоненти
Европската Унија и пет други земји, како и претставници на воздухопловната индустрија, ја предупредија администрацијата на претседателот на Соединетите Американски Држави, Доналд Трамп, дека новите царини за увоз на комерцијални авиони и компоненти за воздухопловство би можеле да ги загрозат глобалните синџири на снабдување и производство, според серија поднесоци објавени денес од Министерството за трговија на САД.
Како што е наведено, Европската Унија, Канада, Кина, Јапонија, Мексико и Швајцарија побараа да се зачува режимот на слободна трговија воспоставен во 1979 година преку Договорот за трговија со цивилно воздухопловство, објавува Ројтерс.
Европската Унија, која годишно увезува авиони во вредност од околу 12 милијарди долари од Соединетите Американски Држави и извезува авиони во вредност од 8 милијарди долари во САД, вели дека понатамошните ограничувања би „ги поткопале меѓусебно корисните трговски активности“ и додава дека ќе преземе контрамерки за да ја одржи рамнотежата.
