Ќе се кандидира ли Заев за претседател? – Ковачевски: Процесот не е започнат, но секој има еднакви шанси!
Премиерот Димитар Ковачевски денеска по новинарско прашање околу тоа дали поранешниот премиер и претседател на СДСМ Зоран Заев се спрема за кандидат за претседател, рече дека во партијата има дефинирана процедура во однос на кандидирање претседателски кандидати.
„Секој член на партијата, којшто ги исполнува критериумите, а тие се наведени и во Статутот и во правилниците коишто важат во партијата може да биде кандидиран или да се самокандидира што се случувало во партијата во минатото, а потоа низ дебата од месните организации преку општинските организации до раководството, Извршниот Одбор и ЦО, се носи одлука за тоа кој ќе биде претседателски кандидат на партијата, се разбира претседателски кандидат на коалицијата која што ќе настапи на изборите. Процесот се уште не е започнат, меѓутоа сите кандидати имаат еднакви шанси во, би рекол, тој натпревар, да ја добијат честа да бидат претседателски кандидат на СДСМ“, вели Ковачевски.
Во однос на појавувањето во јавност на Заев, премиерот Ковачевски, не гледа причина зошто некој не би се појавил во јавност, а пред тоа да извршувал високи државни и партиски функции и смета дека тоа е позитивно, бидејќи сепак тоа се луѓе коишто имаат искуство и знаење, кое може да го споделат со политичарите, со деловната заедница, па и со граѓаните.
