Два објекти во Аеродром добија забрана за работа, граѓаните се жалеле!
Општина Аеродром изрече забрана за работа на два угостителски објекти по извршените инспекциски надзори на терен.
Ова на социјалните мрежи го истакна градоначалникот Дејан Митески кој порача дека акцијата на инспекциските служби следела по бројни поплаки и пријави од страна на локалните жители.
При контролите е констатирано дека овие два објекти не се придржувале до важечките законски прописи за работа. Од Општината предупредуваат дека ова е само почетна санкција и доколку сопствениците продолжат со непочитување на законите, ќе се соочат и со соодветни кривични пријави.
Најавено е дека интензивните контроли врз угостителските и туристичките објекти ќе продолжат и во наредниот период, со посебен фокус на вечерните и ноќните часови.
Општинските власти апелираат до граѓаните да продолжат да ги пријавуваат сите забележани неправилности на официјалната електронска адреса: inspekcija@aerodrom.gov.mk. Целта на овие засилени контроли е обезбедување мирна и уредна средина за сите жители на Аеродром.
