ДУИ со жестоки критики: Вреди е политичка измама, наместо ЕУ донесовте српски свет и скандали
Демократската унија за интеграција (ДУИ) денеска упати серија остри обвинувања кон коалицијата Вреди, оценувајќи ја нивната прва година на власт како „симбол на неуспеси и секојдневни скандали“. Според ДУИ, владејачката албанска коалиција целосно потфрлила во исполнувањето на клучното ветување – уставните измени за евроинтеграција, за кои постојано ги пролонгирале роковите.
„РЕДИ дојде на власт со големи ветувања и со строги рокови за уставните измени. Прво ветија дека тоа ќе се случи пред формирање на Владата. Потоа рекоа во првите 100 дена. На крај, во шест месеци. Денес, по една година, Албанците слушаат само оправдувања дека ‘времето не било доволно’“, се вели во соопштението на партијата.
Од ДУИ тврдат дека владејачката коалиција нема „ниту визија, ниту храброст, ниту политичка волја“ за европската иднина на земјата. Наместо тоа, велат од партијата, Вреди ја отворила вратата за влијанија од Белград и Москва.
„Наместо уставни измени и европска интеграција, ВРЕДИ ја поткопа Охридската рамковна спогодба, ја ослаби позицијата на Албанците и ја блокира европската иднина на државата. Ветија национални проекти – го донесоа Иван Стоилковиќ како вицепремиер за имплементација на Охридскиот мировен договор. Ветија интеграција во ЕУ – донесоа партнерства со политичари што го пропагираат ‘Српскиот свет’“, обвинуваат од ДУИ.
Во соопштението се наведени и други неисполнети ветувања, како 2.500 нови работни места и финансиска поддршка за младите, кои се оценети како „изборни измами“.
Цитирајќи го поранешниот министер за надворешни работи, Бујар Османи, од ДУИ додаваат дека избегнувањето на дебатата за ЕУ е „стратегија за прикривање на корупцијата и неуспесите на оваа влада и за спречување на еднаквоста на Албанците“.
Партијата ја нарекува власта „голема политичка измама и национален срам“ и најавува дека одговорноста ќе биде побарана во октомври.
„Октомври ќе биде моментот кога граѓаните ќе кажат ‘доста’ на измамите, неуспесите и слепата послушност кон антизападните интереси. Во октомври, тие ќе ја манифестираат својата волја на народниот референдум. Никој нема да може да избегне од политичката и правната одговорност“, заклучуваат од ДУИ.
