Драма на рочиште во „Идризово“: Брза помош дојде, му се влоши состојбата на Деко – проценија дека е способен да го следи судењето!
Денешното рочиште за судскиот процес „Пулс“, кое се одржа во специјалната судница во затворот „Идризово“, беше накратко прекинато поради влошената здравствена состојба на првообвинетиот Дејан Јованов-Деко. Интервенцијата на Брзата помош уследи по драматичниот апел на неговата одбрана, која побара итна замена на притворот со мерка куќен притвор поради сериозни постиоперативни компликации.
Адвокатката Коцевска во изјава за медиумите појасни дека нејзиниот клиент неодамна поминал две тешки операции на ‘рбетот, од кои последната била извршена итно во петокот, на 17 април, поради тешка инфекција и гноен процес. Според нејзините зборови, Јованов бил донесен на судењето директно од болница со отворена рана и во крајно нехумани услови, што претставува огромен ризик од дополнителни инфекции. Одбраната обвини дека во притворот тој добивал само „импровизиран третман“ од нестручни лица.
И покрај алармантните тврдења на адвокатите, медицинската екипа која интервенирала на местото на настанот проценила дека обвинетиот е способен да го следи судењето. Судијката Груевска-Илиевски информираше дека по укажаната помош, на Јованов му било советувано да земе храна и вода, што тој го одбил, по што судот донел одлука расправата да продолжи.
