ДКСК ги чешлаше изборните пријави: Директорка делела партиски материјали – случајот проследен до Јавното обвинителство
Државната комисија за спречување на корупцијата (ДКСК) на денешната седница информираше дека постапувала по повеќе пријави поврзани со изборниот процес. Дел од нив се проследени до надлежни институции, додека за дел е утврдено дека нема прекршувања.
Една од пријавите што ќе добие натамошна разрешница се однесува на директорка на средно училиште. Според ДКСК, таа во електронска комуникациска група споделила содржина креирана од политичка партија и изборен плакат, со молба за поддршка на кандидат преку споделување на објавата. ДКСК утврдила дека надлежен орган за понатамошно постапување е Јавното обвинителство, до каде и ќе биде проследен предметот.
Антикорупционерите расправале и за пријава за наводна изјава на кандидат за градоначалник, кој ветувал парични средства во готово за ранливи категории и пензионери. ДКСК утврдила дека тука нема прекршување.
„Се работи за изјава дадена пред медиуми за дел од програма на кандидат кој што е посветен на ранлива категорија на граѓани како и на пензионери. Се работи за проект кој што го промовира и мерка која подразбира дел од неговата програма и промоција на активностите кои што ќе бидат реализирани во текот на мандатот“, посочија од ДКСК, заклучувајќи дека не се работи за директно прекршување на изборниот процес.
Во неколку други случаи, ДКСК не утврдила прекршувања. За пријавен избор на професор за проректор на универзитет, Комисијата утврдила дека не се прекршени законските одредби, бидејќи избраното лице веќе имало работен однос во моментот на донесување на одлуката, што не се смета за започнување на нова постапка за вработување.
Слично, затворена е и пријава против одговорно лице на средно училиште кое донело одлука за вработување, бидејќи ДКСК утврдила дека тоа е сторено во рамките на дозволениот период.
На денешната седница, Државната комисија за спречување на корупција претходно ги усвои клучните документи за борба против корупцијата во наредните години. Усвоени се Проценката на ризици од корупција и Методологијата за изготвување на новата Национална стратегија за спречување на корупцијата и судирот на интереси 2026–2030.
Седницата продолжи со дискусија за Извештај од антикорупциска проверка на одредби од Изборниот законик, конкретно Глава VI, која се однесува на „Медиумско претставување“ (член 75 до член 76-д).
