Денеска Владата утврдува највисоки цени на овошјето и зеленчукот
Домати, краставици, кромид, карфиол, пипер, грав, леќа, банани, портокали, мандарини и лимон, се дел од зеленчукот и овошјето за кои денеска Владата ќе ги утврдува највисоките малопродажни цени.
Министерот за економија Крешник Бектеши на својот фејсбук профил соопшти дека анализите на податоците за овие производи се завршени. Претходно тој рече дека пресметките покажале од 100 до 200 отсто профитни маржи кај некои продукти од овожјето и зеленчукот.
-Утре се определуваат највисоки цени за домати, крастивици, кромид, карфиол, пипер, грав, леќа, банани, портокали, мандарини и лимон. Ги повикувам граѓаните да дадат исто така придонес во делот на дополнување на листата на производи, како и на цените на кои тие сметаат дека треба да се замрзнат во делот на овошје и зеленчук или други производи. Се грижиме заедно, најави вчера Бектеши.
Одлуката ќе биде донесена по претходна анализа на анализите од Царинската управа за увозните цени на трговците, како и од сознанијата на Министерството за земјоделство, шумарство и водостопанство, кое следело колку се реалните трошоци за производство на земјоделците и пазарниот информаривен систем каде се следат цените на големо и мало за земјоделските производи.
