Делфините кои бегаат од војната во Украина, ги воодушевуваат децата во Романија
Во делфинариумот во црноморското пристаниште Констанца, Романија, тренерите на делфини соработуваат и покрај јазичната бариера и успешно „комуницираат“ со делфините од двете земји.
Минатата година, делфинариумот прими четири делфини и три морски лава, заедно со нивните тренери и лекари, бегајќи од гранатирањето во источниот украински град Харков.
„Сега имаме повеќе колеги… украински колеги – луѓе и делфини“, рече романската тренерка Мона Мундреску, седејќи на работ од базенот по утринскиот настап пред стотици воодушевени ученици.
„Многу добро се согласуваме заедно, зборуваме ист „јазик“. Ова е најдоброто нешто што може да им се случи на нашите делфини“, додаде таа.
Романија е една од четиринаесетте земји на Европската унија кои имаат делфинариуми и морски животни.
Делфинариумот Констанца, кој е дел од голем природонаучен музеј и истражувачки комплекс, е дом на женските делфини Ни Ни и Чен Чен од 2010 година.
Во Харков, локалниот делфинариум почна да бара начини да ги премести делфините и морски лавови веднаш по гранатирањето што започна минатата година во февруари. Делфините Кики, Маја, Марусија и Ветерок и морските лавови Алекс, Марија и Зосија веднаш биле префрлени во Одеса, каде чекале два месеци романските и украинските власти да го подготват пакетот документи неопходни за нивно внесување во Европската унија.
Животните пристигнаа во Констанца на почетокот на мај и беа ставени во карантин еден месец пред да бидат запознаени со двете резидентни женски делфини Ни Ни и Чен Чен.
„Тоа беше ново искуство за нас и нашите животни, бидејќи ние сме различни, тие имаат две многу стари и многу убави девојки, а ние имаме многу млади животни, на почетокот немаше контакт“, изјави предводникот на украинскиот тим. Елена Комогорова. „Но, сега… ние сме многу добри пријатели. Истото важи и за нашите тимови“, сподели таа.
Животните почнаа да настапуваат заедно на претстави кон крајот на јуни, пливајќи со тренерите, скокајќи низ обрачите и балансирајќи топки. Морските лавови се мешаат со публиката.
„Сакаме да останат со нас што е можно подолго“, изјави менаџерот на делфинариумот Џулијан Калин. „Тие се вредни луѓе и делфини и ги сакаме со нас бидејќи заедно сме прекрасно семејство“, рече тој.
