Делеле изборен материјал во Куманово – активисти на СДСМ пријавија напад од членови на Движењето ЗНАМ
Политички активисти од СДСМ денеска напладне пријавија дека биле нападнати од членови на Движењето ЗНАМ во кумановската населба Средорек, додека делеле изборен материјал.
Од Министерството за внатрешни работи (МВР) потврдуваат дека кај нив било пријавено дека двајца активисти на една партија биле нападнати од активисти на друга партија.
„Денеска околу 11:40 часот, А. К. (32) и И. С. (33), двајцата од Куманово, пријавиле дека во населбата Средорек, додека делеле изборен материјал, С. С. и Р. Ш., членови на друга партија, агресивно се однесувале кон нив и им упатувале закани, по што Р. Ш. физички ги нападнал. Се преземаат мерки за расчистување на случајот и во координација со јавен обвинител против нив ќе биде поднесена соодветна пријава“, соопшти МВР.
Кандидатот за градоначалник од СДСМ и коалицијата, Мартин Костовски, обвини дека нападот го извршиле членови на штабот на Движењето ЗНАМ и кандидатот за советник Самет Салиевски, пред нивниот мини-митинг во Средорек. Според Костовски, Салиевски до неодамна бил советник од СДСМ, но ја напуштил партијата и за изборите се најде на листата на ЗНАМ.
„Случајот веднаш го пријавивме во полиција и очекуваме да се преземат сите потребни мерки за да се спречи политичкото насилство врз неистомислениците,“ изјави Костовски.
Од Движењето ЗНАМ, носителката на листата за советници, Ивана Георгиевска, ги негира обвинувањата.
„Целосна лага е обвинувањето дека нашиот кандидат Самет Салиевски нападнал активист на СДСМ. Вистината е дека тој бил сведок на расправија помеѓу активисти на СДСМ близу неговиот дом и реагирал смирено и воздржано на вербалните провокации“, рече Георгиевска.
Таа додаде дека изјавата на Костовски е обид за политичка манипулација и добивање поени пред јавноста, со оглед на резултатите од анкетите кои, според неа, најавуваат убедлив пораз за СДСМ.
