Дали четиридневната работна недела е решение за подобар живот и поголем профит?
Воведувањето на четиридневна работна недела го подобрува менталното здравје на вработените и им користи на компаниите, покажува нова студија.
Економистката од Бостонскиот колеџ, Џулиет Б. Шор, која е и главен истражувач во организацијата 4Day Week Global, следела повеќе од 245 компании и непрофитни организации кои ја тестирале четиридневната работна недела во последните три години. Во статија за The Wall Street Journal, наведува дека скратувањето на работната недела за еден ден донело значителни здравствени придобивки за вработените: речиси 70 oтсто од работниците изјавиле дека чувствуваат помал „степен на прегорување“, повеќе од 40 отсто забележале подобрување во менталното здравје, 37 отсто велат дека и нивното физичко здравје се подобрило.
За работодавачите, резултатите се исто така позитивни. Повеќето компании што го воведоа пробниот модел на четиридневна работна недела забележаа: зголемување на приходите, намалување на бројот на откази и поголемо задоволство на вработените. Всушност, повеќе од 90 отсто од над 200 компании што ја започнаа пилот-програмата до јуни 2023 година, го задржаа четиридневниот модел една година подоцна.
foto freepik.com
