Црвен крст изгуби голем хуманист – почина Глигор Новачевски
Попладнево се огласија од Црвен крст од каде велат дека изгубиле голем хуманист.
По кратко боледување, во раните утрински часови, починал нивниот долгогодишен колега Глигор Новачевски.
„Во овие моменти на болка тешко е да се најдат вистинските зборови за да го опишеме она што нашиот Гиго ни го остави зад себе во својата над 30-ет годишна кариера во Црвениот крст. Секогаш насмеан и ведар, полн со знаење и инспирација, неуморно и успешно го промовираше и организираше крводарителството во нашата организација. Но тој можеше и правеше се она што ќе беше побарано од него. Беше секогаш и секаде каде што беше потребно. Ништо не му претставуваше потешкотија. Секогаш подготвен да одвои време и насмевка за луѓето околу него.
Нашиот Глигор беше омилен и ведар лик, вистински црвенокрсташ кој низ годините преку својата неуморна работа и постигнувања остави длабока трага во нашата организација. На сите многу ќе ни недостасува. Останува на нас да се сеќаваме на неговата добрина и сите пријатни моменти со кои не задолжи и убедени сме дека неговиот инспиративен дух ќе продолжи да биде заедно со нас во исполнување на нашата хуманитарна мисија.
Најискрено сочувство до неговото семејство, пријателите и најблиските.
Во чест на нашиот ценет колега Глигор Новачевски, Црвениот крст на РСМ ќе одржи комеморативна седница во Домот на хуманитарни организации Даре Џамбаз на 13 јуни, 2025 со почеток во 10:00 часот.
Погребот ќе се одржи истиот ден на градските гробишта Бутел во Скопје од 12.30 часот. Нека му е вечна слава и нека почива во мир“, велат од Црвен Крст.
