Велигденската трпеза стана луксуз: Граѓаните купуваат „колку за мерак“
Годинава, празничната атмосфера пред Велигден не ја следи иста еуфорија на пазарите. Иако тезгите се полни, а понудата разновидна, купувачите се воздржани – најчесто купуваат минимално или само разгледуваат, правејќи внимателни пресметки пред секој трошок.
Цените на основните прехранбени производи достигнаа ниво кое за многумина е тешко достапно. Јагнешкото месо, традиционален симбол на празничната трпеза, годинава достигнува и до 700 денари за килограм. Покрај него, поскапени се и јајцата, маслото за јадење, како и сезонскиот зеленчук.
Доматите и пиперките, кои се неизоставен дел од празничните трпези, во дел од маркетите и пазарите се продаваат по цени повисоки од 200 денари за килограм. Граѓаните велат дека ваквите цени ги принудуваат да купуваат само најосновно, наместо да подготват богата трпеза како порано.
„Секој купува колку може, не како што сака“, велат дел од купувачите, додавајќи дека мерки требало да има пред празниците, а не по нив. Дел од граѓаните се снаоѓаат така што пазарат во помали градови, каде цените се пониски, додека други се надеваат на намалувања по празниците.
Ценовниот притисок не е изолиран само на неколку производи – поскапување се забележува речиси кај сите категории, особено кај овошјето. Според последните податоци, инфлацијата повторно бележи раст и во март достигнала околу 5 проценти на годишно ниво.
Економските аналитичари предупредуваат дека глобалните случувања, особено нестабилноста на Блискиот Исток, директно влијаат врз цените на храната и енергенсите. Премиерот најави дека земјата ја очекува економски предизвикувачка година, а можни мерки за стабилизирање на цените се разгледуваат, меѓу кои и укинување на ДДВ за одредени производи и ограничување на трговските маржи.
Сепак, граѓаните остануваат скептични и велат дека за оваа година, празничната трпеза ќе биде поскромна од кога било – не по избор, туку по потреба.
