Бугарија ќе увезе 8, а ќе уништи 2,8 милиони вакцини против Ковид-19

Бугарското Министерство за здравство соопшти дека поради недостаток на побарувачка, зголемен е бројот на вакцини против КОВИД-19 во магацините во земјата и дека е неизбежно отстранувањето на вакцините со истечен рок. Министерот за здравство Асен Меџидиев рече дека нема интерес за вакцинација. 

„На прагот сме да уништиме 2,8 милиони вакцини кои се блиску до истекување“, изјави Меџидиев.

Тој рече дека поради слабиот интерес на граѓаните за вакцинација, ги затвориле одделенијата во главните болници во земјата, кои речиси никој веќе не ги посетува.

Понатаму Меџидиев додаде дека по уништувањето на 2 милиони дози од вакцината, чиј рок беше истечен минатата година, годинава ќе истече и рокот за 2,8 милиони дози.

Министерството за здравство соопшти дека земјата треба да увезе уште 8 милиони вакцини до крајот на оваа година, во зависност од координираната политика на Европската унија (ЕУ) во борбата против Ковид-19.

Еден дел од овој договорен увоз се плаќа однапред. Меџидиев рече дека увозот на овие вакцини е „непотребен трошок“.

Бугарија е меѓу земјите со најниска стапка на вакцинација против Ковид-19 во ЕУ. Околу 39.000 луѓе ги загубија животите како последица на инфекцијата со коронавирус во земјата.