БИЗНИСМЕНОТ КОЈ ГО ИЗГРАДИ БУРЏ КАЛИФА САКА ДА ИНВЕСТИРА ВО УЛЦИЊСКАТА РИВИЕРА: Ќе „никне“ ли нов Дубаи на југот на Црна Гора?
Сончевите априлски денови на плажата “Велика Плажа“ во Улцињ и предсезонскиот мир без гужви не укажуваат дека ова
конкретно место ја разбранува целата политичка сцена во Црна Гора, пишува денеска BBC.
Доколку намерата на владата се оствари, на оваа долга
песочна плажа на југот од
Јадранското Море, популарна кај туристите, со арапски капитал, би можела да се
изгради луксузен комплекс и марина за јахти, нешто на што локалните жители,
екологистите, активистите и некои опозициски партии се спротивставуваат со
недели.
„Најавената инвестиција би имала лошо влијание врз нас,
љубителите на кајтерството,
бидејќи изградбата на овие неверојатни марини и високи згради би го променила
лицето на Велика Плажа и
морето“, вели инструкторот по
кајтсурф Немања Шкобиќ, кој неодамна се вратил од Виетнам.
Владата на Црна Гора, предводена од Милојко Спајиќ, лидер на
движењето „Европа сега“ (ПЕС), планира заеднички инвестиции со компании од
Обединетите Арапски Емирати (ОАЕ) што, како што велат, би донеле „забрзан
економски раст и повисоки стандарди за граѓаните“.
Мухамед Алабар, претседател на компанијата „Игл Хилс“, е
подготвен да инвестира во Улцињската ривиера, која даде највисока понуда на
тендерот на почетокот на март за четиригодишен закуп на половина од државните
плажи во Улцињ.
Бизнисменот чија компанија го изгради облакодерот Бурџ
Калифа во Дубаи е познат на Балканот како инвеститор во изградбата на големата
луксузна населба „Белград на вода“, како и други слични проекти во Хрватска и
Албанија.
Во земја која е кандидат за членство во Европската Унија и
во својот устав се обврзала да биде еколошки прифатлива, активистите стравуваат
дека инвестицијата би го загрозила не само локалниот туризам во дрвени колиби
покрај реката Бојана и покрај Велика Плажа, туку и природното живеалиште на птиците што живеат тука.
