АВИОКОМПАНИИТЕ ОТКАЖУВААТ ЛЕТОВИ, БРИТАНСКИ EASYJET ДУРИ 1.700: „Моравме поради проблеми“
Британската
авиокомпанија EasyJet денеска објави дека откажала два отсто од своите летни
летови поради загриженост за функционирањето на авиосообраќајот за време на
сезоната на летните одмори и патувања. Оваа одлука ќе влијае на 180.000
патници, пренесува Ројтерс.
EasyJet објави
дека има доволно пилоти и екипаж, но дека поради проблеми во авиосообраќајот
била принудена да откаже 1.700 летови, од вкупно 90.000 летови, кои беа
закажани за остатокот од јули и август. Авиокомпанијата главно ќе ги откажува
летовите од својата најголема база на аеродромот Гетвик во Лондон. Во
соопштението се додава дека 95 отсто од погодените патници веќе се префрлени на
алтернативни летови.
EasyJet,
најголемата британска авиокомпанија според бројот на патници, додаде дека овие
промени се неопходни за да се избегнат откажувања на летови во последен момент
што би биле поскапи и ќе предизвикаат поголеми непријатности за патниците.
Европскиот воздушен простор е намален поради војната во Украина, а посебен
проблем се кадровските промени и недостатокот на персонал во некои области на
воздушниот сообраќај како што е контролата на летање, додава британската
агенција.
ФОТО: EPA-EFE/ALEJANDRO GARCIA
