Јавен обвинител барал на убиецот да му се укине забраната за напуштање на живеалиштето
Трагедијата во Велес добива нова, скандалозна димензија откако Основниот суд во Велес денеска официјално соопшти дека И.С., човекот кој во понеделникот ја уби својата поранешна партнерка Р.К. и нејзиниот татко, бил осуден за насилство и закани кон неа само пет дена пред да го изврши злосторството. Наместо ефективна затворска казна, судот му изрекол само условна осуда, а по предлог на Обвинителството, му биле укинати и дел од мерките за претпазливост, вклучително и забраната за напуштање на живеалиштето.
Според соопштението на судот, на 10 септември 2025 година, И.С. бил прогласен за виновен за кривичните дела „Загрозување на сигурноста“ и „Насилство“, кои се однесувале на настани од февруари и март годинава во кои жртви биле Р.К. и нејзиниот пријател И.М.. За овие дела, судот му изрекол условна осуда – казна затвор од 1 година и 4 месеци, која не би се извршила доколку тој не стори ново кривично дело во рок од 3 години.
Уште пошокантно, на истиот ден, судот донел решение со кое му ги укинал мерките „забрана за напуштање на живеалиштето“ и „обврска за јавување во полициска станица“. Оваа одлука, како што се наведува во соопштението, била донесена по предлог на Јавниот обвинител и со согласност на бранителот. Единствена мерка што останала на сила била забраната за приближување до жртвата Р.К. и нејзиниот пријател И.М..
Само пет дена по оваа судска одлука, на 15 септември, И.С. ја прекршил мерката за забрана на приближување и ги извршил убиствата, по што си го одзел и сопствениот живот.
Ова официјално соопштение од судот е најконкретниот доказ досега за целосен институционален потфрлаж и отвора сериозни прашања за одговорноста на судството и обвинителството, кои и покрај историјата на насилство, не изрекле мерки кои реално ќе го спречеле убиецот и ќе го заштителе животот на жртвата.
