Арсовска тврди дека „Пуцко Петрол“ ја прекинале испораката на гориво за ЈСП – вели се обидуваат да создадат хаос!
Градоначалничката на Град Скопје, Данела Арсовска упати силни обвинувања кон компанијата „Пуцко Петрол“ и нејзиниот сопственик, Асмир Јахоски, тврдејќи дека тие намерно ја прекинале испораката на нафта и со тоа се обидуваат да создадат хаос во градот.
Како што вели, и покрај постоечкиот договор за снабдување, Јахоски, наводно под политички притисок и уцени, ја стопирал доставата на гориво.
Според соопштението, ова не е првпат „Пуцко Петрол“ да постапува на ваков начин. Сличен инцидент, како што се наведува, се случил и за време на новогодишните празници, кога граѓаните беа оставени да чекаат на студ. Арсовска смета дека ваквите „идиотски и криминогени постапки“ се дел од политички игри и дека граѓаните не треба да трпат поради нив.
Таа најавува дека ќе покрене соодветна постапка за материјална и кривична одговорност против Асмир Јахоски и „Пуцко Петрол“ за непочитување на договорот. Целта, како што велат, е да се спречи намерата автобусите на ЈСП да престанат да сообраќаат и да се заштити јавниот интерес на граѓаните на Скопје.
Во соопштението се нагласува и дека политичките игри и обидите за предизборен дефокус се водени од ВМРО и Мицкоски, во соработка со Управниот одбор на ЈСП и Јахоски, со цел да се оттргне вниманието од наводната штета што тие му ја нанеле на ЈСП и Скопје во последните четири години.
