Арсовска почна постапка за враќање на споменикот на Ќосето пред судовите

Градоначалничката на Град Скопје, Данела Арсовска почнува со постапка за да го врати споменикот на Андон Јанев – Ќосето (1855-1953) со кама в рака, познат во историјата како ликвидатор на ВМРО, кој си го убил и брата си, пред комплексот судови во Скопје, јавува СДК.мк.

Таа доставила барање до Општина Центар да се даде согласност за почнување постапка согласно која би почнала процедурата за враќање на споменикот на истата локација од која беше тргнат.

Имено, овој споменик во февруари 2018 беше отстранет по налог на тогашниот градоначалник Петре Шилегов, бидејќи бил дивоградба, а тогаш Шилегов посочи дека градежниот инспекторат на Општина Центар извршил увид на фактичката состојба и утврдил дека инвеститорот Град Скопје нема решение за поставување на овој споменик.

Неколку месеци по стапување на функција, Арсовска кажа дека ќе го врати овој споменик, а додаде и дека со нејзиниот тим го барале но истиот не можеле да го најдат.