Арсовска до Стојкоски: Освен твоите другарчиња од штаб, сите останати знаат да читаат, прашај ги граѓаните дали сакаат хемиски фабрики!
Градоначалничката на Град Скопје, Данела Арсовска, преку објава на социјалните мрежи остро го нападна градоначалникот на Ѓорче Петров, Александар Стојкоски, обвинувајќи го за поддршка на спорен Детален урбанистички план (ДУП) со кој, според неа, се дозволува изградба на хемиски фабрики и висококатници во центарот на општината.
„Стојкоски, освен твоите другарчиња од штаб, сите останати знаат да читаат, тоа ти е сега најголемиот проблем“, напиша Арсовска на Facebook, посочувајќи дека ДУП-от за кој станува збор добил негативно мислење од Град Скопје, но сепак бил изгласан на ниво на општината.
Арсовска објави фотографии со, како што наведува, делови од контроверзниот план, во кои се предвидува простор за три хемиски фабрики, како и над 30 висококатници на 157.000 квадратни метри.
Таа тврди дека градоначалникот Стојкоски ја игнорира волјата на жителите и го повика да организира референдум на кој граѓаните ќе се изјаснат дали сакаат такви објекти во нивната средина.
Во објавата, таа посочи и дека целиот ДУП е јавно достапен на веб-страницата на општината, притоа споделувајќи линк до документот.
Од Општина Ѓорче Петров засега нема официјален одговор на обвинувањата.
