Јаневска: Забележан е прилив на иселеници кои се враќаат во Македонија
Министерката за образование и наука Весна Јаневска изјави дека првите статистички податоци веќе покажуваат прилив на иселеници кои се враќаат во Македонија.
Таа нагласи дека, иако бројките сè уште не се големи, ваквиот тренд претставува сигнал дека политиките за задржување на младите и подобрување на условите во земјата почнуваат да даваат резултат.
Одговарајќи на прашања поврзани со намалувањето на бројот на основци, Јаневска истакна дека актуелната власт презема конкретни мерки за справување со демографските предизвици, за разлика од претходните периоди, кога, како што рече, проблемите биле само набљудувани.
„За оние на коишто им редеа чевли за да ги вратат, тие ништо не направија, но ние, може да видите во статистиката, веќе имаме прилив на иселеници. Тој не е голем, но луѓе почнаа да се враќаат во Македонија. Тоа е резултат на политиките кои ги спроведува оваа Влада“, изјави министерката.
Таа додаде дека процесот на демографски промени е долгорочен, но дека Министерството за образование и Владата остануваат фокусирани на создавање подобри услови преку инвестиции во образованието и законски измени во високото образование, со цел младите да ја гледаат својата иднина во земјата.
