Анестезиологот од Тетово заврши во затвор, одреден му е притвор
Анестезиологот вработен на Гинекологија во тетовската болница кој во живо на Тик Ток покажуваше пациентки, доби притвор од 8 дена.
Од Секторот за внатрешни работи Тетово информираат дека истиот е испратен во затвор Шутка.
Од таму велат дека лицето е осомничено за „несовесно работење во службата“ и „неовластено снимање“.
„На 15.04.2023 година, судија на претходна постапка при Основен суд Тетово на лицето В.Д.(43) од Одри, Тетово му одреди мерка притвор во траење од 8 дена и истиот ќе биде испратен на издржување притвор во Затвор Скопје. Тој е осомничен за „несовесно работење во службата“ и „неовластено снимање“ во тетовската клиничка болница каде работел како анестезиолог. В.Д. го снимал медицинскиот персонал и пациентите на едно од одделенијата и директно го објавил на социјалната мрежа „Тик-Ток“, велат од СВР Тетово.
Инаку, случајот во полиција го пријави директорот на клиниката Пелумб Вела, кој вчера за медиумите истакна дека вработениот е отпуштен од работа.
-Изразувам жалење за синоќешниот случај во тетовската болница. Сакам да ве информирам дека јас како директор го пријавив случајот во полициска станица. Во разговор со министерот, јас и организациониот директор донесовме одлука за престанок на работниот однос на ова лице, бидејќи има повеќе прекршоци во работното време“, изјави Пелумб Вела.
