Јанчев реагира: Жалам за трагедијата, но станува збор за политичка пропаганда
Пратеникот од Левица, Сашко Јанчев, се најде во центарот на вниманието откако Обвинителството покрена обвинение против него за учеството во сообраќајка во која загина тинејџер. Јанчев преку својата Фејсбук страница реагираше, изразувајќи жалење за трагичниот случај и нагласувајќи дека според него станува збор за политичка кампања од страна на власта.
„Најпрво, жал ми е за се што се случи таа вечер. Не поминува ден да не помислам на ова. Веднаш после настанот пружив помош и повикав помош. Направив се што можеше да се направи. Морам да забележам дека брза помош чекавме цели 50 минути. Морам да забележам и дека јас сум единствен легален учесник во сообраќајот во таа несреќа“, пишува Јанчев.
Тој потоа ја обвинува власта дека случајот го користи за политичка пресметка.
„Власта уште истиот ден, само после неколку часа, почна да го користи случајов за политичка пресметка со мене преку координирани и планирани напади. Уште рано наутро преку нивните пропагандни медиуми пуштија вести дека сум бил пијан, дрогиран и дека сум возел бесно. Ништо од ова не е точно. Пуштија вест дека сум возел бесен џип и ставаа слики од нови скапи возила. И ова не е точно. Моето возило е старо 20 години“, стои во реакцијата на Јанчев.
Пратеникот додава дека обвинувањата продолжиле од страна на премиерот и други членови на владејачката партија.
„Истиот ден ДПМНЕ ме осудија од партиска прес-конференција без притоа да ги спомнат, а не пак да ги повикаат на одговорност Министерот за внатрешни и министерот за здравство. Потоа премиерот на интервју во вести ме осуди и суптилно ми се закани со Обвинителство. И отогаш навака постојано пробуваат медиумски да ја наметнат темава со цел да наметнат наратив дека јас некого сум прегазил“, пишува Јанчев.
Тој посочува дека пред да се одржи Анкетната комисија за несреќата во Кочани, пратениците од владејачкото мнозинство во собраниските ходници му се заканувале дека поради Анкетната комисија ќе биде изложен на притисок.
„Демек ако Левица ја отвора темата за Кочани они ќе удираат по мене заради сообраќајната несреќа. Чиниш сообраќајната несреќа е исто со она што се случи во Кочани“, реагира пратеникот.
Јанчев истакнува дека не се повикува на никакви пратенички имунитети.
Обвинението се однесува на тешката сообраќајна несреќа што се случи на 14 септември по полноќ во скопското село Марино, во која животот го загуби 16-годишниот Матеј Димовски, а неговата 13-годишна сопатничка беше тешко повредена.
