АНАЛИЗА НА „ЕКО-СВЕСТ“: Партиите ветуваат зелено Скопје, но планираат нови булевари кои ќе го зголемат загадувањето
Иако политичките партии во своите изборни програми за Скопје предвидуваат мерки за справување со климатските промени, најголемите од нив, СДСМ и ВМРО-ДПМНЕ, истовремено планираат изградба на нови булевари и улици, што ќе доведе до зголемување на сообраќајот и загадувањето. Ова е клучниот наод од анализата „Изборен зелен семафор“ што ја спроведе еколошката организација Еко-свест, која ги оцени програмите според обврските што градот ги има преземено кон Европската повелба за градоначалници.
Од организацијата велат дека биле пријатно изненадени што сите достапни програми предвидуваат мерки за зголемување на отпорноста на главниот град, но посочуваат и на сериозни контрадикторности.
„Загрижува што и СДСМ и ВМРО-ДПМНЕ како најголеми политички партии, иако имаат предвидени мерки за намалување на емисиите на територијата на градот, сепак во голем дел планираат изградба на нови или реконструкција на постоечки булевари и улици што секако ќе придонесе за зголемување на сообраќајот во градот и зголемување на емисиите и загадувањето“, изјави Елена Николовска, Програмски координатор за клима во Еко-свест.
Анализата открива и други сериозни недостатоци во програмите. Иако општините имаат надлежности да поттикнуваат поставување фотоволтаични панели на домовите, само „Зелен Хуман град“ предвидел вакви мерки. Исто така, сите анализирани програми недоволно обрнуваат внимание на заштитата на природата, бидејќи создавањето нови зелени површини не е исто што и заштита на природата. Забележано е и дека само две од анализираните програми предвидуваат мерки за намалување на енергетската сиромаштија, додека едукацијата за клима и животна средина има многу ниска застапеност. И покрај потребата од регионален пристап, само две изборни програми планираат меѓуопштинска соработка.
Од Еко-свест потсетуваат дека Скопје е потписник на Европската повелба за градоначалници уште од 2010 година, со што има преземено обврска да изработи Локален акциски план за енергија и клима, документ кој до денес не е изработен.
