АКО БИДАТ „ФАТЕНИ“ СО АЛКОХОЛ ВО ЈАВНОСТ ИЛИ ВО КОСТИМ ЗА КАПЕЊЕ- КАЗНА ОД 150 ЕВРА: Хрватска ригорозна и за гласна музика на терасите

На првиот ден од годинава во Сплит стапи на сила новото
решение за комунален ред, според кое за прекршителите на мерката се пропишани
повисоки казни.

Така, може да се очекува летово да нема туристи во костими
за капење на улиците, бидејќи доколку бидат „фатени“ од комуналната стража ќе
бидат казнети со 150 евра.

Истата глоба е пропишана и за оние кои пијат алкохол на
јавни места, а казната за шетање кучиња без поводник е согласно одлуката за
условите и начинот на чување миленици и изнесува 66,36 евра за физичко лице.

Сплитќани
и нивните гости сезонава ќе бидат надгледувани од 21 комунален чувар на
улиците, а уште 12 ќе чекаат во зградата на градската управа на повик, пишува
Poslovni.hr.

Од август 2020 година, градот Дубровник има слична одлука за
комунален ред, а минатата година првите „голи“ туристи платија казни од 1.000
куни.

Новата сплитска одлука за комунален ред е донесена на
последната седница на Градскиот совет во 2022 година, а стапи на сила од новата
година. Како што се наведува,
со оваа одлука е воведен нов концепт на пропишани забрани кои се однесуваат
исклучиво на зоната А која има посебна заштита и на одредби кои се однесуваат
на подрачјето на целиот град.

Меѓу важните
измени беше и забраната за поставување електроакустични уреди на терасите на
угостителските објекти во зоната А, што значи дека на тие места не може да се
користат звучници и засилувачи.

Според одлуката,
дозволено е изведување музика во живо без електроакустични уреди. Секој
што нема да го почитува ова правило ќе биде казнет со 1.320 евра, а
дополнително одговорното лице ќе се казни со 300 евра, а физичкото лице со 260
евра.

ФОТО: YouTube/Print Screen