Аја однесена на безбедно место поради страв од киднапирање
Малечката Аја родена под урнатините на нејзината куќа во Сирија е однесена во болница неколку часа по разорните земјотреси што ги погодија Турција и Сирија на 6 февруари.
Таа е родена во урнатините на куќата, а нејзините родители и браќата и сестрите загинале во земјотресот.
Здравствениот дом во Африн презеде мерки на претпазливост за да го заштити девојчето Аја од можно киднапирање и измама за посвојување, изјави извор за Би-Би-Си.
Во понеделникот имаше насилен инцидент во болницата во регионот под контрола на опозицијата каде што таа беше на лекување. Медицинската сестра, придружувана од двајца вооружени мажи, според написите го претепала менаџерот, јавува Би-Би-Си.
Шефот на здравствената управа, Ахмад Хаџ Хасан, ги негираше тврдењата на социјалните мрежи дека станува збор за осуетен обид за киднапирање на Аја.
„Тврдењата за киднапирање беа недоразбирање. „Ова беше целосно внатрешно болничко прашање и немаше никаква врска со бебето“, изјави тој за Би-Би-Си.
Илјадници луѓе се понудија да го посвојат бебето минатата недела, откако нејзината приказна беше широко објавена во локалните и меѓународните медиуми.
Сепак, Управата за здравство е решена да и даде приоритет на нејзината здравствена состојба и да продолжи со претпазливост во процесот на посвојување, вели изворот.
Мајката на Аја се породи набргу откако нивната семејна куќа во градот Џиндарис беше уништена во земјотресот со јачина од 7,8 степени според Рихтеровата скала што ги погоди јужна Турција и Сирија на 6 февруари.
Таа починала откако ја родила Аја, која сè уште била поврзана со папочната врвца кога спасувачите ја пронашле.
Драматичната снимка објавена на социјалните мрежи покажува како маж носи бебе, покриено со прашина, откако било извлечено од урнатините.
Во несреќата загинаа и таткото на Аја, четирите браќа и сестри и една тетка.
Калил ал-Сувади, далечен роднина кој бил таму кога ја извлекле на безбедно, го донел бебето во болница во Африн.
Нејзиниот педијатар, Хани Маруф, минатиот четврток за Би-Би-Си изјави дека Аја пристигнала во „лоша состојба“.
„Имаше испакнатини, модринки, беше ладна и едвај дишеше“, додаде тој. Таа одговорила на третманот и следниот ден состојбата и се стабилизирала.
