48 часа притвор за двајца осомничени за запленетата марихуана во Србија
По предлог на обвинител од Основно јавно обвинителство за гонење на организиран криминал и корупција, на две лица им е одреден краткотраен притвор во траење од 48 часа, откако претходно биле сослушани во својство на осомничени. Мерката ја определил судија на претходна постапка при Основен кривичен суд Скопје.
Од Обвинителството информираат дека по спроведените дејствија и анализата на прибраните докази, постојат основи на сомнение оти осомничените преземале активности поврзани со запленетите пет тони марихуана во Србија. Поради тоа, јавниот обвинител доставил образложен предлог за определување краткотраен притвор.
Како што се наведува во соопштението, мерката е побарана со цел обезбедување на присуството на осомничените и создавање услови за непречено преземање на неопходните процесни дејствија, како и за носење одлука за понатамошниот тек на постапката.
Од ОЈОГОКК посочуваат дека во предмети со поголема сложеност, особено кога станува збор за случаи со меѓународен карактер, законските рокови се ограничени, што ја оправдува примената на краткотраен притвор.
Обвинителството најавува дека продолжува со интензивни активности во рамки на истрагата и дека јавноста ќе биде навремено информирана за развојот на случајот, согласно законските можности.
