2025, ГОДИНА НА ИЗВОЗ, ИНВЕСТИЦИИ, ИНФРАСТРУКТУРА, СО МИНИМУМ 3 ОТСТО РАСТ
Политичките лидери од Балканот во Брисел, Коморските во
Скопје, недела неработен ден под лупа, економски развој на државата само со
минимум раст од 3% на БДП – СРЕЌНА НОВА 2025
Управниот одбор на Коморскиот инвестициски форум (КИФ),
асоцијација која ги обединува шесте стопански комори од регионот на Западен
Балкан, утре (17.12.2024 г.) во Скопје ќе ја одржи својата 33та седница, на
која домаќин ќе биде потпретседателот на Коморскиот инвестициски форум и
претседател на Стопанската комора на Северна Македонија Бранко Азески.
На седницата, лидерите на коморите од регионот ќе
дискутираат за клучните приоритети во активностите на Коморскиот инвестициски
форум во 2025 година, имајќи го во вид отпочнувањето на примената на новиот
Акциски план за Заеднички регионален пазар, во кој КИФ е активно вклучен во
структурата на управување со процесот во однос на имплементацијата и
надгледувањето на мерките предводени од приватниот сектор.
Со усвојувањето и имплементацијата на стандардите на ЕУ,
како основа на мерките во рамките на Заедничкиот регионален пазар, Акцискиот
план служи како важна пристапна порта кон единствениот пазар на ЕУ во многу
сектори и како алатка за унапредување на процесот на пристапување во ЕУ, и
затоа вклучување на стопанските комори од регионот со активности, преку КИФ во
овој процес, е од клучно значење за максимизирање на придобивките.
На домашен план како да започнаа да се заокружуваат клучните
економски активности. Се донесе буџетот, се финишираат активностите со
унгарскиот кредит, Бехтел и Енка се внесени во извршување на работите,
странските инвестиции продолжуваат, на анализа одат неколку суштински закони
меѓу кои и Законот за работни односи во делот на недела неработен ден. Што
значи после три годишна
имплементација Законот оди на
преиспитување.
Растот на Бруто домашниот производ од 3% за третото
тромесечие дава поттик и надеж за акција – 2025 да биде година во која секоја
нареда година ќе имаме повисока стапка на раст. За таа цел, Комората во петокот
(13.12.2024 година) организираше два настани кои ги фокусираат нашите
приоритети – борба против корупцијата и градење вештини за потребите на
бизнисот во високо образовните институции, како продолжение на се` она што го
направивме во дуалното образование во средните училишта.
Да резимираме, бизнисот е структура која работи на долги
патеки и во моментов претставува единствен кохезионен партнер на нашите
простори: меѓудржавни, меѓунационални, меѓуверски, генерациски итн.
Нашиот предлог е сосема едноставен. Поддржете ги нашите
вакви определби, за да може бизнисот да Ве поддржи вас.
П.С. После новогодишните празници нашите активности
продолжуваат, а ќе започнат со две значајни работи:
1. Во Скопје ќе се одржи работна средба на Асоцијацијата на
Балкански Комори (АБК), на која исклучиво ќе се разговара за развојот на
инфраструктурата на Балканот во функција на развој на бизниот, особено за
железницата која е рак рана на транспортот како важна алатка во нашето
работење. За таа цел, оваа недела ќе имам работни средби со моите колеги од
Грција и Турција, Масутис и Хисарчиклиоглу, на кои ќе ги дефинираме заклучоците
на АБК.
2. На домашен план, ќе стартуваме со отворање на Институтот
за извоз кој што произлезе од проектот “Поддршка на приватниот сектор за
регионална интеграција”, кој се спроведува во партнерство со УСАИД, со новиот
состав на Националниот совет за извоз како обединувачко тело на приватниот и
јавниот сектор во делот на извозот.
