111 граѓани поминаа скрининг по пожарот во Трубарево, 11 ќе продолжат со прегледи на Клиниката за пулмологија

Вкупно 111 граѓани учествувале во лекарските скрининг процедури по пожарот во Трубарево. Од нив, 11 ќе продолжат со дополнителни прегледи на Клиниката за пулмологија, додека останатите немаат потреба од понатамошен третман, соопшти вечерва министерот за здравство, Азир Алиу.

Додаде дека граѓаните кои се упатени на дополнителни пулмолошки испитувања се повозрасни.

Алиу апелира сите граѓани кои чувствуваат кашлица, главоболки или отежнато дишење да се пријават уште вечерва за скрининг.

„Скринингот продолжува и утре од 10 до 16 часот, а ако е потребно, ќе продолжи и понатаму. Целта е да ги опфатиме сите граѓани кои сметаат дека треба да поминат скрининг или имаат симптоми како кашлица, главоболки или отежнато дишење. Добро е здравствените проблеми да се детектираат навреме за да можеме да ги третираме“ – истакна министерот.

Според протоколот, скринингот ќе се повтори уште два пати, по три и по шест месеци, за да се следи влијанието на загадувањето по пожарот.