10 годишно дете е најмлад пушач на цигари во Македонија
Македонија се соочува со алармантна состојба на зависност од никотин, особено меѓу младата популација. Последните истражувања покажуваат дека дури 70% од адолесцентите барем еднаш пробале цигари, а најмладиот регистриран пушач имал само 10 години, пишува МРТ.
Во земјава, 45% од возрасната популација активно пуши, што Македонија ја сместува меѓу земјите со највисока стапка на зависност од тутун во Европа.
Битолчанецот Димитриевски е само еден од многуте чие здравје е сериозно нарушено од пушењето. По неколку интервенции, меѓу кои и три бајпаса, тој вели дека никотинската зависност го чинела години поминати по болнички ходници.
„Канцер на бели дробови, заболувања на органите за дишење, па дури и рак на органите за варење – сето тоа може да биде последица од долгорочно пушење,“ предупредува д-р Тодоровски, специјалист по пулмологија. Тој нагласува дека никотинот предизвикува психичка зависност која постепено го уништува организмот.
Во обид да се справи со овој проблем, во Центарот за јавно здравје во Битола функционира Советувалиште за одвикнување од пушење. Таму се нудат индивидуални терапии, таблетарна поддршка и психолошка помош за сите кои сакаат да го остават тутунот.
