ЗОО Скопје: Нема простор за паника поради појава на животинска туберкулоза
Зоолошка градина Скопје информира дека неодамнешните информации за појава на животинска туберкулоза кај поединечни животни не претставуваат ризик за посетителите. Безбедноста на јавноста и грижата за животните остануваат врвен приоритет.
Туберкулозата кај животни не е нова појава и може да се сретне и во природата, парковите или игралиштата. Преносот на ова заболување од животни на луѓе е исклучително редок и бара долг и директен контакт со болни животни, што е невозможно за обичните посетители.
Вработените кои се во директен контакт со животните се редовно тестирани, а сите резултати до сега се негативни. Се преземаат строги ветеринарни и санитарни мерки, вклучително и редовна дезинфекција на живеалиштата, надзор и соодветен третман на сите сомнителни животни, како и поставување на дез бариери.
Превентивно, „Бејби ЗОО“ ќе биде изолирано и затворено за јавност поради ниските температури, но посетителите продолжуваат да се движат по безбедни патеки без близок контакт со животните.
Случаи на животинска туберкулоза се регистрирани и во други зоолошки градини низ светот, но тоа никогаш не претставувало ризик за јавноста.
ЗОО Скопје ќе продолжи редовно да ги известува граѓаните и да соработува со надлежните институции за превенција и контрола, обезбедувајќи позитивно и сигурно искуство за сите посетители и највисок степен на грижа за животните.
